نجم النجوم بابكر سانتو

بابكر سانتو اسم كبير جاء من اسرة سانتو التي قدمت لودمدني والسودان شقيقه عبده سانتو والفاضل سانتو .. ويعتبر بابكر الاوسط بين اخوه .. جاء من اسرة اتحاداوية واختار الاهلي مدني بطوعه واختياره .. وبزغ نجمه في سماء الكرة السودانية في عهدها الذهبي واستطاع ان يحقق الكثير من الانجازات .. شارك مع منتخب السودان الذي نال ذهبية امم افريقيا .. ويعتبر الاهلاوية افضل لاعب مر علي تاريخ الكرة السودانية ..نلتقيه هنا لنأخذ ملامح من سيرته الذهبية يحكي فيها بالعامي مسيرته الطويلة مع كرة القدم ويوثق لبعض الفترات من تاريخنا الرياضي ويعتبر هذا هو الحوار الثاني الذي اجريه معه وكان الاول عندما كان في المملكة العربية السعودية قبل عام من الان .. وللفائدة فقد اقتبسنا بعض اجاباته من حوارنا السابق معه تجدونها بين طياته .
التقاه : معتصم عيدروس
البدايات
بابكر سانتو من مواليد ودمدني 1945 بحي القبة .. وترعرعت في حي ود ازرق مربع (11) .
في ذلك الوقت كانت الروابط مشهورة بفرق الاحياء .. فريقنا كان اسمه الدينمو .. وطبعاً كلها كانت اجتهادات شخصية وليست منتمية لهيئة رعاية الشباب او اي جهة اخري وكان ناشطوا الفرق في الاحياء هم البسيروا الفريق واللاعبين كانوا بدفعوا اشتراك ..
في ودازرق كان فريق الدينمو والوادي والوحدة كان بلعب فيه عبدالرحمن سر الختم وعثمان مليم وعبده مالك .. وفريقنا الدينمو كان رئيسه مولانا حسن علوب القاضي حالياً وكان بلعب فيه تاج الدين محمد الحسن (الجناح الطائر) وبدر الدين علي عبدالرازق المهندس حالياً وعز الدين ارباب ووتي ومروان ويوسف حدوس وشلة كبيرة من اولاد الفريق.

الادارة كانت من نفس لاعبي الفريق .. حسن علوب كان الرئيس وهو بتاع تمارين ساكت ما كان بلعب معانا المباريات .. والباقين موزعين واحد ماسك القروش والتاني مسئوليته التمارين وكده.. الكلام دا كان من 59 الي 62.
المجموعة دي كلها مشت نادي الاهلي وبقينا اشبال الاهلي والوقت داك الاهلي كان في ود ازرق .. وكنا انا وسنطة اتحاداوية .. لكن ما كان عندنا حل غير نلعب في اشبال الاهلي .
جاني عرض من علم الوطن عشان انضم ليهم وكانوا في الدرجة الثالثة انضميت ليهم وفي نفس السنة طلعنا الدرجة الثانية ونلت لقب هداف الدوري .. وكان معانافي علم الوطن حاج عثمان نور الدائم وود الحاج ومحمد ابوالاصفيا في الادارة واللاعبين احمد ابوصاحبو وهاشم الياس وصلاح حسن عامر ..
رجعت الاهلي
قمت تاني رجعت الاهلي
معاي هاشم واحمد .. وتسجيلي في الاهلي حصلت فيه مشكلة لانه اساساً انا من اسرة اتحاداوية .. واخوي عبده الكبير كان بلعب في الاتحاد وناس الاتحاد حاولوا يضغطوا عليه بيه .. لكن انا من طفل صغير كنت متحرر في رايي وما كانوا بفرضواعلي شئ ولمن لقيت تعامل ناس الاهلي معاي كويس وعلاقاتهم الاجتماعية قوية مشيت الاهلي .. واكتر حاجة ساعدتني امشي الاهلي انو ود عمتي بنداس كان بلعب في الاهلي وساندي ووقف معاي ..
سجلوني بي (70) جنيه
تسجلت في الاهلي بوعد 70 جنيه لكن لي اسع ما استلمتها والادارة كان فيها امين عبدالله الفكي وسكرتارية بابكر عثمان البشير وكمال عبدالعزيز وعبدالدائم موسي الفادني ..
ما اشتغلت بموضوع القروش كتير وكان همي العب في فريق كبير والاهلي فعلاً فريق كبير وكانوا بلعبوا فيه العمالقة سيد مصطفي وحكيم الجاك واحمد الجاك واحمد حامد وعبدالله جبارة الله وبلة سليم وحمدي والسر بدوي ومحمد عبدالصمد وحمد النيل كودي وقاسم سنطة والباقر مارنجان واحمد الشهاوي وبابكر كتة وبابكر دافيس وكجن واحمد دامبا ..
اول مباراة لعبتها كانت سنة 63 مع فريق الرابطة وكان بضم عمر النور لاعب الزمالك ومحمد الحسن شرة والدقيل وعثمان مرحوم وعبدالحميد سليمان وغالب وكان بحرس مرماهم حاج بعشوم..
في الكورة دي رجعوا حكيم الجاك للوسط وانا لعبت ان صايد ..
ما خفت من الكورة وخشيت عادي احتمال لانو مما قمت كان فيني صفة القائد .. ولعبت وفي بالي انو انا لو ما لعبت كويس تاني داير لي سنة سنتين عشان اخش تاني التشكيلة وامكن ما العب نهائي ..
المهم اول ما خشيت احرزت هدفين .. وبعداك تاني ما طلعت من تشكيلة الاهلي .. وما حصل لعبت مباراة وطلعت منها ومستواي مهزوز.
اول ديربي في مدني
اما اول مباراة لي مع الاتحاد فكانت بالنسبة لي مباراة مصيرية وخشيتها بمفهوم اكون او لا اكون وكنت مصر اظهر فيها بالمستوي المشرف لانها كانت مباراة القمة في مدني والناس بتتكلم بيها قبل شهر .
خشيت المباراة دي وفي بالي انو عشان نتخطي الاتحاد لازم نهاجمه والاتحاد معروف بدفاعه القوي وكان فيه كمال دورية وجعفر ود النوبة ومحمد الحسن بابوني ومن خلفهم الحارس العملاق ابراهيم بدوي ..
المهم هاجمنا الاتحاد من الاول وفزنا عليهم بثلاثة اهداف لهدفين احرزها سيد مصطفي واحمد حامد واحرز للاتحاد محجوب الله جابو وهو كان بجيب كل اهداف الاتحاد في الوقت داك.
حفزوني بي خمسة جنيه وكانت مبلغ كبير مشيت اديتها لوالدتي حاجة عشة طوالي.. واستمر الحال علي ذلك .
مدني كانت مميزة باهتمام المسئولين الحكوميين وكان محافظ المديرية حسين علي كرار بحفز اللاعبين بي جائزة نجومية الموسم واخدها سنتين علي التوالي حكيم الجاك وانا جيت اخدتها بعده والمحافظ اداني مفتاح دهب سماه مفتاح المدينة صنعه ود الحاج الصائغ.
مع المنتخب القومي
في سنة 65 دخلت الفريق القومي وحتي 72 كنا 18 لاعب ما بنتفارق (سبت دودو ، عبدالعزيز عبدالله، ابراهيم بدوي ، نجم الدين حسن، امين زكي، ابراهيم يحيي ، عوض كوكا، سمير صالح ، جيمس ، رمضان ، سعد الفن ، جكسا ، اسماعيل بخيت ، حسبو الصغير والاسيد.
اول مباراة كانت سنة 65 في الدورة العربية بمصر مع منتخب فلسطين وكان مكون من لاعبي الزمالك والاهلي وعندهم لاعبين حضروا من شيلي وبوليفيا وانتهت لصالح السودان 3/1 والمباراة الثانية كانت امام منتخب لجج باليمن الجنوبي وفزنا 10 صفر احرزت فيها 3 اهداف . نجم النجوم بابكر سانتو Santo2

الوقت داك فرق القارة ما كانت بتقدر علي السودان الا مصر اصبحت عقدة ابدية .. ومع ذلك فما كانت بتفوز علينا بالساهل .
اول مشاركة افريقية كانت كاس استقلال كينيا (جوموكونياتا) لعبنا ضد يوغندا وانته بفوز السودان بثلاثة اهداف مقابل هدف ولعبنا ضد كينيا وفزنا بهدف احرزه احمد سالم لاعب الموردة واحرزنا الكاس.
بطولة افريقيا
المنتخب كان بضم عبدالفتاح حمد مدرب والمجموعة السابقة واضافوا ليناعبدالكافي من بري .
السودان لعب في مجموعة الخرطوم وكان فيها اثيوبيا وساحل العاج والكاميرون والكنغو.
خسرنا من ساحل العاج بهدف وفزنا علي اثيوبيا 3/1 وعلي الكاميرون 2/صفر وعلي الكنغو 3/صفر.
اتاهلنا للمرحلة الثانية ساحل العاج اول المجموعة والسوداني الثاني ومن مجموعة مدني جات مصر اولاً وغانا ثانياً.
غانا فازت علي ساحل العاج وفزنا علي مصر واتذكر انو نجم الدين وسمير صالح تصادما وخرج نجم الدين ورجع الدحيش وفزنا بهدفين لهدف.
ووصلنا النهائي مع غانا وفاز السودان بهدف الاسيد وشلنا الكاس.
حصلت مشكلة لما الاسيد احرز الهدف والكان في الزمن القاتل .. لاعبي غانا زعلوا ورفضوا يطلعوا المقصورة لاستلام الميداليات الفضية وقام رئيس الجمهورية في ذلك الوقت بتسفيرهم بطائرة خاصة بعد المباراة طوالي .
بعد فوزنا بكاس افريقيا لاول مرة كرمونا بقطعة ارض و100 جنيه .. الاراضي ادونا ليها في حي الرياض بالخرطوم قام سمير صالح قال لا يدونا ليها في مدني وفعلاً انا وسمير استلمنا قطع ارض في مدني حي مايو .
الاهلي عظيم
جيت راجع الاهلي تاني ..عندنا حبوبتنا رحلت القضارف وعندها 600 متر في البيت الساكنين فيه في العشير ومساحته 1500 متر كانت دايرة تبيعها قمت تمين القروش (150) جنيه واشتريت منها الجزء .. واسع جاء فيها الشارع وعوضونا بقطعتين ودا كله الطلعت بيه من الكورة لكن اكضب عليك لو قلت ليك ما مرتاح لانو كل ما انظر لزملائي في الاندية الاخري الهلال والمريخ والاتحاد الافنوا زهرة شبابهم في الاندية واشوف حالهم كيف وكيف الاندية اتجاهلتهم ارجع اقول انو الاهلي عظيم لانه حتي الان بعد 30 سنة غياب جيت ولقيت حب الاهلاوية لي لسع في محله ودي ما بتتعوض بالمليارات.
اول مباراة ضد الهلال العاصمي تقريباً كانت سنة 68 في مدني وكان الهلال بضم عوض كوكا وابوزيد وديم الصغير وابراهيم يحيي وجكسا وشاويش والمباراة انتهت بالتعادل بهدف لكل فريق احرز للاهلي الباقر وللهلال شاويش.
هزيمة تاريخية للمريخ
اما اول مباراة ضد المريخ فكانت قبل مباراة الهلال لانو العلاقة بين الاهلي والمريخ كانت اكبر بسبب وجود فواد التوم وحسن النور في ادارة المريخ والاثنين كانوا من اولاد مدني والمباراة دي كانت تاريخية لن انساها .
في الشوط الاول احرزنا 4 اهداف قام عبدالعزيز عبدالله حارس المريخ زعل وجدع الفانيلة وطلع وخش عبده زمان واحرزنا الهدف الخامس .. قام نزل المطر والغي المباراة وناس المريخ حمدوا الله لانو الاهلي كان ممكن يوصلهم 11 قون من الاهداف الخمسة احرزت (3) والباقر جاب الاثنين الباقيات.
سجلت للهلال وناس الاهلي وقفوني
طلبوني ناس الهلال عشان العب معاهم وجيت لعبت سنة واحدة وناس الاهلي وقفوني سنتين ..
عشان اسجل في الهلال فاوضني كيشو وادوني (250) الف جنيه ..
مع الهلال ما لعبت ضد المريخ لكن لعبت ضد فرق بلغارية ورومانية .
رجعت مدني وما فكرت اجي الخرطوم تاني لانه هم اللاعب في الاقاليم كان يجي الفريق القومي وانا حققتها وانا بلعب في الاهلي .. وناس الاهلي كانوا مريحيني زي لاعبي الهلال والمريخ .
في الاهلي انا كنت مريح الياس سلمان وسعد الطيب كتير وكنا بنستوعب الشرح وننفذ حسب ظروف المباراة وما يطلبه المدرب ودا افاد الاهلي كتير .
منتخب الجزيرة
منتخب الجزيرة كان مدربه سيد سليم ومحمد عبدالرازق كندا وكنا محجوب الله جابو وسمير صالح وعز الدين الجعلي وشرة وعمر النور وضو البيت وغالب حسن وحكيم الجاك واحمد الجاك والمريح محمد الحسن والاسيد ومحمد حموري والناير من الرابطة وما بتذكر الباقين .. لكن اول مشاركة كانت في اعياد القطن ولعبنا ضد منتخب الخرطوم وفزنا فيها وبتذكر ميرغني ابوشنب كتب منتخب الجزيرة (أ) يهزم منتخب الجزيرة (ب) لانه منتخب الخرطوم كان فيه ( Cool

لاعبين من الجزيرة اذكر منهم فيصل عصبة ، عامر عوض عبده ، الفاضل سانتو ، معتصم حموري.
زغبير كسرني
اصبت في مباراة هلال اهلي في كاس السودان كان معانا في المجموعة الامل عطبرة وحي العرب بورتسودان ..
الاهلي فاز علي الامل عطبرة بعشرة اهداف والهلال فاز عليه بخمسة .. خشينا المباراة درون نكسب غالبين نكسب .. وكان فريقنا لا يستهان به
اللاعبين قالوا يمشوا حديقة القرشي يرفهوا رفضت امشي وقلت لي سنطة داير ارتاح عشان بعدين عندي قنبلة داير افجرها في استاد الخرطوم ضحك علي ومشوا .
قبل المباراة وانحنا ماشين علي الميدان كانت المحاضرة من المدربين سعد والياس وكانت بتركز علي بسط الهيمنة لازالة رهبة الجمهور باللعب الجماعي.
انا قلت ليهم عشان بنخاف ما يجيبوا فينا قون سريع انا داير اطمن المدافعين ناس سنطة وود الامين ..قلت ليهم لو ضربة البداية بقت عندنا انحنا ما نفك الكورة الا وهي جوة شباك الهلال .. وبعد داك تاني كل ربع ساعة حا نجيب قون وفعلاً كانت ضربة البداية عندنا جبت سنطة معاي قدام ولعبناها ومشينا بيها .. وفعلاً قبل ما تتم دقيقة كنت وصلت زغبير حارس الهلال بي الزاوية وما كان معاي اي لاعب من الهلال قلت اجي عليه قام زغبير نط لي في ركبتي وكان مفروض تكون ضربة جزاء وكان ممكن سنطة يجيبها هدف لو تابع لكن الكورة طلعت ومشيت المستشفي وهناك عرفت انو الهلال فاز بهدف.
وكان في ذلك الوقت الحكم النعيم سليمان من شندي ، وليس لي علم بتقدير الحكم في ذلك الوقت ولكن اللعبه في تقديري هي ضربة جزاء لا غبار عليها فهو له تقييمه الشخصي في ذلك الوقت .
بعداك سافرت مصر للعلاج علي نفقة الاهلي .. وجيت راجع سافرت المانيا مع المنتخب الاولمبي علي نفقة الاتحاد العام والاهلي.
مع اسرائيل
كان معانا في الفندق بعثة أسرائيل المشاركة بألعاب القوى ، وعندما تم إحتجازهم من قبل الأخوة الفلسطنين أثر الثورة الفلسطينية ، رفض الفلسطنين دخول أي فرد ألماني أو غيره لإدخال الطعام للمحتجزين من الإسرائلين ، عدا السودانين الموجودين بالطابق الأسفل ، فكنا نحن الذين ندخل لهم الطعام .
إحترافي بنادي الطائي بالسعودية :
بعد داك وفي سنة 1975 كان اللاعب الكبير سيد مصطفى بدرب نادي الطائي وهو لاعب له أسمه حتى الآن بالسعودية ، فطلب منه إحضار لاعبين بمعرفته للعب بنادي الطائي ، حيث سمح للاعب الأحنبي باللعب في الأندية السعودية في ذلك الوقت ، فطلب منهم إحضاري من السودان وكان هذا الكلام في عام 1975م ، وأرسلت لي التأشيرة 3 مرات ، في زمن كان السودان فيه جميلاً ورخياً ولم يهن علي السفر الي وفي المرة الأخير حضر مندوب من النادي وأخذني معه ، وفي ذلك الوقت كان نادي الطائي في الدرجة الثانية وأيضا كان معي اللاعب سلامة الديب من أم درمان ولعبنا لهذا النادي السنة الأول صعد إلى الدرجة الأولى ثم الموسم التالي إلى درجة الممتاز ثم هبط بعد عام ثم عدنا به إلى الممتاز مره أخرى ، ومن الذين كانوا يلعبوا بالدوري السعودي في ذلك الوقت أمين دابو ، مصطفى النقر ، علي قاقارين ، تميم الحزامي ، ونجيب غميض ، ولاعبي منتخب تونس الـ 11 الذين شاركوا في تصفيات كاس العالم.
لاعب ولاعب
الفرق بين لاعب الامس واليوم انه اللاعب زمان كان لاعب ومدرب وبعرف يقرأ الميدان والحلول دائما بتجي .. واسع ممكن نضرب مثل مباراة الهلال والترجي الاخيرة في تونس .. والله لو كان دخلنا ابراهيم يحيي كان ممكن يحافظ علي النتيجة ..
اللاعب زمان ما كان بهتم بالقروش .. وكونك تشيل قروش من مشجع ولا قطب دا كان عيب ..
اسع اللاعب بقي مادي وانا بعذره لانه ظروف الحياة اختلفت والكورة بقت احتراف ومهنة.
لاعبون في الذاكرة
(حسبو الصغير ، جكسا ، سعد الفن ، ورمضان ، عوض عبدالغني ، والطاهر حسيب ، علي قاقارين ، عزالدين الدحيش ، سمير صالح ، جميس ، عوض كوكا ، بشاره ، إسماعيل بخيت) بالفريق القومي ، أما منتخب الجزيرة ( جعفر نوبه ، محجوب الله جابو ، الفاضل سانتو ، حموري الكبير ، الريح محمد الحسن ، التاج محمد الحسن ) ، أما مجموعة لاعبي الأهلي المصاحبه للأمجاد (سنطه ، ود الأمين ، التاج محمد الحسن ، صالح عبدالله ، أحمد حامد ، الباقر ، السر بدوي ، كودي ، أبوبكر كته ، أبوصاحبو ، جكن ، طارق بادي ، أبوالنور) .
اعظم لاعب سوداني
ناس مدني بقولوا انا احرف سوداني .. ودا ناتج من حبهم لبابكر سانتو لكن انا شخصياً معجب بالطاهر حسيب لاعب حي العرب بورتسودان .. لانو كان لاعب صاحب مواهب مدهشة .. وعنده خيال واسع .. ولو جينا للحق الكان بعمله الطاهر حسيب اسع رونالدينهو ما بعمل نصه ..
الكرة في مدني متوارثة عبر اسر معروفة بدأت باولاد دياب ثم انطلقت ، اولاد سلمان ، اولاد سانتو ، اولاد كوري، اولاد حموري،اولاد الله جابو .. والاسر دي اي اسرة فيها لاعبين لعبوا في الاهلي والاتحاد.

(منقول من ارشيف منتدي ستارتايمز)

» أسرار بابكر - أنا سوداني فيديو
» لاعب منتخب أوروجواي جونزاليس يتهم حكام كأس العالم بمحاباة النجوم الكبار